Hispania (in hispano: España[1]), in forma longo Regno de Hispania (in hispano: Reino de España[2]), es pago de Europa occidentale, membro de Unione Europeo, cum capitale Madrid et populatione de 47 millione de habitantes in 2019. In plano politico, es monarchia constitutionale cum rege actuale Philippo VI et cum presidente de guberno Pedro Sánchez.
Hispania moderno nasce in seculo XV cum unione de Corona de Castella (cum regina Isabella I de Castella) et de Corona de Aragonia (cum rege Ferdinando II de Aragonia). In isto tempore, Hispania es potentia politica majore de Occidente: in 1492, dum expulsa regnos musulmanos de Peninsula Iberica (Reconquista), navigatore Christophoro Columbo reperi America. Durante tres seculo sequente, Hispania explora et conquire multo territorios in toto mundo, notabili in America Centrale (Imperio Azteca victo ab Hernán Cortés in 1521) et in Sud-America (Imperio Inca victo ab Francisco Pizarro in 1532). Sed in seculo XVIII et XIX, isto potentia se erode et multo colonias hispanicas obtine independentia. Initio de seculo XX es marcato ab bello civile hispanico (1936-1939), quod se termina cum victoria de Francisco Franco qui instaura regimine dictatoriale usque suo morte in 1975. Post isto, rege Joanne Carolo I (Juan Carlos I) recupera throno et instaura monarchia constitutionale actuale.